#862 - *பரிசுத்த ஆவியானவரும், அற்புத ஆவிக்குரிய வரங்களும் - விளக்கவும்*
*பதில்*
இதை சுருக்கி எழுதவே முடியாது. நீண்ட விளக்கம் அவசியம் – பொறுமையாய் வேத வசனகுறிப்புகளை வேதத்தில் ஒப்பிட்டு பார்த்து அடுத்த வார்த்தைக்கு கடந்து செல்லவும்.
வேதத்தைப் படிக்கும்போது ஆவிக்குரிய வரங்களைப் பற்றி நாம் அறியமுடிகிறது.
ஏனென்றால் அவற்றைப் பற்றி அறியக்கூடிய அனைத்தும் வேதத்தில் காணப்படுகின்றன.
இந்த வரங்கள் சம்பந்தப்பட்ட அனைத்தையும் முழுவதும் எவரும் கொண்டிருக்கிறார்களா என்ற கேள்வி இந்நாட்களில் உள்ளது.
இந்த வரங்கள் இன்றும் கிடைக்கின்றன என்று வேதம் கற்பிக்கிறதாக பலரின் எண்ணம் உள்ளது. இன்னும் சிலர் இந்த வரங்களை சொந்தமாக தயாரித்துக்கொள்கிறார்கள். இதன் மூலம் இந்த மக்கள் பலரின் விசுவாசத்தை கவிழ்த்துப்போட்டுவிடுகிறார்கள்.
மறுபுறம், உள்ளார்ந்த ஆவியானவரை மறுப்பவர்களும் உள்ளனர்.
*பரிசுத்த ஆவியானவருக்கும் - ஆவியின் வரங்களுக்கும் இடையே உள்ள வித்தியாசத்தை முதலில் அறியவேண்டும்*.
பரிசுத்த ஆவியானவர் ஒரு நபர். தேவத்துவத்தில் ஒருவர் -யோ. 16:13.
கர்த்தருடைய வார்த்தைக்கு கீழ்படிந்த ஒவ்வொரிலும் பரிசுத்த ஆவியானவர் தங்கியிருக்கிறார் - அப். 5:32
கிறிஸ்து சிலுவையில் மரிப்பதற்கு முன்னரே ஆவியானவர் உலகில் இருந்தார் (ஆதி. 1:2) ஆனால் அவர் தங்கி தாபரிக்கவில்லை.
பரிசுத்த ஆவியானவரால் அசுத்தமான கூடாரத்தில் குடியிருக்க முடியவில்லை. பாவத்தின் காரணமாக மனிதன் தேவனிடமிருந்து பிரிக்கப்பட்டான். இந்த பாவப் பிரச்சினை தீர்க்கப்படும் வரை மனிதன் பிரிந்து இருந்தான். (ஏசாயா 59: 1-2; எபிரெயர் 10: 4, 9: 13-15)
இயேசு சொன்னார், "வேதவாக்கியம் சொல்லுகிறபடி என்னிடத்தில் விசுவாசமாயிருக்கிறவன் எவனோ, அவன் உள்ளத்திலிருந்து ஜீவத்தண்ணீருள்ள நதிகள் ஓடும் என்றார். தம்மை விசுவாசிக்கிறவர்கள் அடையப்போகிற ஆவியைக்குறித்து இப்படிச் சொன்னார். இயேசு இன்னும் மகிமைப்படாதிருந்தபடியினால் பரிசுத்த ஆவி இன்னும் அருளப்படவில்லை" (யோ. 7:38-39)
இயேசுவின் சிலுவை மரணத்திற்கு பின் மனிதர் சுவிசேஷத்திற்குக் கீழ்ப்படிவதன் மூலம் பாவங்களின் மன்னிப்பை பெற்று கெள்ள முடிகிறது. (ரோமர் 6: 17-18) அந்த சூழ்நிலை அவருடைய சரீரம் பரிசுத்த ஆவியின் ஆலயமாக மாறுகிறது (I கொரி. 6:19-20).
யோவான் 14:17 ஐ கவனியுங்கள். "அவர் உங்களுடன் வாசம்செய்து, உங்களுடனே இருக்கிறார்." இயேசு ஒரு புதிய உறவைப் பற்றி பேசுகிறார். ஆவியானவர் உங்களுக்கு அருகில் இருந்தார், இப்பொழுதோ அவர் “உங்களுக்குள்” இருப்பார்.
இயேசுவின் சிலுவை மரணத்திற்குப் பிறகு பிரசங்கிக்கப்பட்ட முதல் நற்செய்தி பிரசங்கம் அப்போஸ்தலர் 2-ஆம் அதிகாரத்தில் பதிவு செய்யப்பட்டுள்ளது. இந்த பிரசங்கத்தில் பேதுரு மக்களிடம், "பாவங்களை நீக்குவதற்காக இயேசு கிறிஸ்துவின் பெயரால் நீங்கள் ஒவ்வொருவரும் மனந்திரும்பி ஞானஸ்நானம் பெறுங்கள், அப்பொழுது நீங்கள் பரிசுத்த ஆவியின் பரிசைப் (வரத்தைப்) பெறுவீர்கள்" என்றார்.
அவர் ஆவியை குறித்துப் பேசுகிறாரா அல்லது ஆவியின் வரங்களை குறித்துப்பேசுகிறாரா என்பதை இந்த உரையிலிருந்து நாம் தீர்க்கமாக சொல்ல முடியாது.
ஆனால் அப். 5:32ஐ போல உள்ள வசனங்களை கவனித்தால் தீர்க்கமாக அவர் ஆவியானவரைப் பற்றியே பேசுகிறதை குறிப்பாய் சொல்ல முடியும்.
கலாத்தியர் 3:26-27ல் – தேவனுடைய பிள்ளைகளாக எப்படி ஒருவர் மாறுகிறார் என்று பவுல் சொல்கிறார்.
நாம் அவருடைய பிள்ளைகளாக இருப்பதால் என்ன நடக்கிறது என்று கலா. 4:6ல் சொல்கிறார். “மேலும் நீங்கள் புத்திரராயிருக்கிறபடியினால், அப்பா, பிதாவே! என்று கூப்பிடத்தக்கதாக தேவன் தமது குமாரனுடைய ஆவியை உங்கள் இருதயங்களில் அனுப்பினார்”.
தேவன் எப்படி நம்மில் வாழ்கிறார் என்பதைக் பவுல் எபேசியரிடம், "அவர்மேல் நீங்களும் ஆவியினாலே தேவனுடைய வாசஸ்தலமாகக் கூட்டிக்கட்டப்பட்டு வருகிறீர்கள்" என்றார். (எபேசியர் 2:22)
ஒரு மனிதனின் உடல் *ஞானஸ்நானத்திற்கு முன்* பரிசுத்த ஆவியின் ஆலயம் அல்ல என்பதை நாம் அறிகிறோம்.
ஞானஸ்நானத்திற்கு முன்பு அவர் “வார்த்தையை” ஏற்றுக்கொள்ளாத பட்சத்தில் அவர் வேதப்பூர்வமாக ஞானஸ்நானம் பெறவில்லை என்பதாகிறது.
ஞானஸ்நானத்தில் நாம் ஆவியானவரைப் பெறுகிறோம் (கலா. 3:26-27; 4:6).
*வாசமாயிருக்கும் ஆவியானவர் என்ன செய்கிறார்*?
என் உடல் தேவனுடைய ஆலயம் என்பதையும், தேவ ஆவியானவர் என்னில் வாழ்கிறார் என்பதையும் உணர்ந்துகொள்வது என் சரீரத்தை நான் துஷ்பிரயோகம் செய்வதற்கு எதிரான ஒரு தடையாக செயல்படுகிறது.
பவுல் கொரிந்தியரை நோக்கி, "உங்கள் சரீரமானது நீங்கள் தேவனாலே பெற்றும் உங்களில் தங்கியும் இருக்கிற பரிசுத்த ஆவியினுடைய ஆலயமாயிருக்கிறதென்றும், நீங்கள் உங்களுடையவர்களல்லவென்றும் அறியீர்களா? கிரயத்துக்குக் கொள்ளப்பட்டீர்களே; ஆகையால் தேவனுக்கு உடையவைகளாகிய உங்கள் சரீரத்தினாலும் உங்கள் ஆவியினாலும் தேவனை மகிமைப்படுத்துங்கள்" என்றார் (1கொரி. 6:19-20)
கனிகளைத்த தரும்படி ஆவியானவர் நமக்கு உதவுகிறார். (கலா. 5:22-23)
ஆவியின் கனியோ, அன்பு, சந்தோஷம், சமாதானம், நீடியபொறுமை, தயவு, நற்குணம், விசுவாசம், சாந்தம், இச்சையடக்கம் என்ற இவைகள் உங்கள் சொந்த கனிகள் அல்ல !! ஆனால் "ஆவியின் கனி"
அன்பை குறித்தது. யோவான் 13:34-35; ரோமர் 5:5ஐ கவனிக்கவும்.
பரிசுத்த ஆவியானவர் நம்முடைய ஆவியுடன் ஒத்துழைப்புடன் செயல்படுவதால் உடலின் செயல்களைக் கொல்ல உதவுகிறது. ரோ. 8:13
நம்முடைய ஜெப வாழ்க்கையில் ஆவியானவர் நமக்கு உதவுகிறார். ரோ. 8:26
பரிசுத்த ஆவியானவர் நமக்கு உத்தரவாதமாகவும் (அட்வான்ஸ் தொகை போன்றதான கியாரன்டி) முத்திரையாகவும் கொடுக்கப்படுகிறார். (எபே. 1:13-14)
முத்திரை உரிமம் பெற்றிருப்பதைக் குறிக்கிறது. பரிசுத்த ஆவியின் செயல்பாடுகளில் ஒன்று, என் வாழ்க்கையில் “தேவனின் உரிமையை” உண்மையானதாக்குவது. (1கொரி. 6:19-20)
உத்தரவாதம் என்பது – ஒரு அட்வான்ஸ் தொகை – முன்பணம் – வாங்கிக்கொள்வதற்கான ஒர் கியாரன்டி தொகை. இது வாழ்க்கைத் தரத்துடன் தொடர்புடையது என்று நான் நம்புகிறேன். வரவிருக்கும் நித்தியத்தில் நான் இப்படி பரிசுத்தமாய் வாழ்வேன் என்ற அதே வாழ்க்கைத் தரத்தை இப்போது வாழ பரிசுத்த ஆவியானவர் உத்தரவாதமாக வழங்கப்படுகிறார். (ரோ. 8:13; எபி. 6:4-5) இது ஒரு முன் மாதிரி.
நாம் நம் உடலை துஷ்பிரயோகம் செய்யும்போது, அல்லது ஆவியின் கனியை விளைவிக்காதபோது, அல்லது "உடலின் செயல்களைக் கொல்வதில்" தோல்வியுற்றால், அல்லது நம்முடைய ஜெப வாழ்க்கையை புறக்கணிக்கும்போது, அல்லது நம்முடைய பரம்பரை முத்திரையையும் உத்தரவாதத்தையும் காட்டாதபோது, நாங்கள் ஆவியானவரை துக்கப்படுத்துகிறோம். எபே. 4:29-32;
*ஆவியானவரின் அற்புத வரங்கள்*:
ஆவியின் இருப்பிடத்தைப் பார்த்தோம்.
இப்போது ஆவியின் வரங்களைப் பார்ப்போம்.
1 கொரி. 12:8-10ல் ஆவியின் ஒன்பது பரிசுகள் (வரங்கள்) பட்டியலிடப்பட்டுள்ளன.
அவைகள்:
ஞானம், அறிவு, விசுவாசம், குணப்படுத்தும் பரிசுகள், அற்புதங்களைச் செய்வது, தீர்க்கதரிசனம், ஆவிகளைப் புரிந்துகொள்வது, பலவிதமான மொழிகள் பேசுவது, மற்றும் மொழிபெயர்க்கும் திறன்.
*ஒரு கிறிஸ்தவர் இந்த பரிசுகளை (வரங்களை) எவ்வாறு பெற்றார்*?
அப்போஸ்தலர்களின் கைகள் வைக்கப்பட்டதன் மூலம் மாத்திரமே!
அப்போஸ்தலர் புத்தகத்தின் 8 வது அத்தியாயத்தில் "பிலிப்பு, சமாரியா நகரத்திற்குச் சென்று அவர்களுக்கு கிறிஸ்துவைப் பிரசங்கித்தார்" (வ5).
12வது வசனம் கூறுகிறது, "தேவனுடைய ராஜ்யத்துக்கும் இயேசுகிறிஸ்துவினுடைய நாமத்துக்கும் ஏற்றவைகளைக்குறித்து, பிலிப்பு பிரசங்கித்ததை அவர்கள் விசுவாசித்தபோது, புருஷரும் ஸ்திரீகளும் ஞானஸ்நானம்பெற்றார்கள்."
அப். 2:38, 5:32ன்மூலம் நாம் ஏற்கனவே கற்றுக்கொண்டவற்றின்படி, அவர்கள் பரிசுத்த ஆவியின் இருப்பைப் பெற்றார்கள், ஆனால் ஆவியின் பரிசுகளைப் (வரங்களை) பெறவில்லை.
சமாரியர் தேவவசனத்தை ஏற்றுக்கொண்டதை எருசலேமிலுள்ள அப்போஸ்தலர்கள் கேள்விப்பட்டு, பேதுருவையும் யோவானையும் அவர்களிடத்திற்கு அனுப்பினார்கள். அப். 8:14
இவர்கள் வந்தபொழுது அவர்களில் (சமாரியாவில் ஞானஸ்நானம் பெற்றவர்கள்) “ஒருவனும் பரிசுத்தஆவியைப் பெறாமல்” இருந்ததைக் காண்கிறார்கள். !! அப். 8:15
நாம் கவனிக்க வேண்டியது –
ஆவியானவர் தங்கியிருப்பதற்கும் "மேல் வந்து விழுவதற்கும்" வித்தியாசம் உள்ளது.
தமிழ் வேதாகமத்தில் – பெற்றார்கள் என்று எளிமையாக இருக்கிறது.
ஆங்கிலத்தில் – விழுந்தது என்றும், மூலபாஷையான கிரேக்கத்தில் எபீபிப்டோ என்றும் இருக்கிறது. அதற்கான தமிழ் அர்த்தம் – அணைத்து கொள்வது / பற்றிப்பிடிப்பது / அவர்கள் மீது விழுவது / அவர்கள் சார்பில் விழுந்து அமிழ்த்துவது என்பதாகும்.
அவ்வண்ணமே அப். 8:16-17ன்படி அப்போஸ்தலர், ஜெபம் செய்து ஞானஸ்நானம் பெற்ற சமாரியர் மீது தங்கள் கைகளை வைத்தபோது பரிசுத்த ஆவியானவர் அவர்கள் மீது பொழிந்தருளப்பட்டார் (Fallen upon them / அவர்கள் மீது அபரிதமாக அல்லது வலுவாக வந்து விழுந்தார்)
கீழ்படிகிறவர்களுக்கு பரிசுத்த ஆவியானவர் தந்தருளப்படுகிறார் என்ற அப். 5:32ன் படி அவர்கள் ஏற்கனவே ஆவியின் இருப்பைப் பெற்றிருந்தார்கள்.
அப். 8:17ம் வசனம் கூறுகிறது, "பின்னர் அவர்கள் மீது கை வைத்தார்கள், அவர்கள் பரிசுத்த ஆவியானவரைப் பெற்றார்கள்." என்று.
அப்போஸ்தலர்களின் கைகளை *வைப்பதன் மூலம் பரிசுத்த ஆவியானவர் வழங்கப்பட்டதை* சீமோன் கண்டார். அப். 8:18
அப்படியென்றால் - பரிசுத்த ஆவியானவரை வழங்கும்படி பிலிப்பு ஏன் அவர்கள் மீது கை வைக்கவில்லை?
அப்போஸ்தலர்களுக்கு மட்டுமே இந்த வல்லமை இருந்தது.
"சீமோன் பார்த்தபோது" என்று 18ம் வசனம் கூறுகிறது. அவர் என்ன பார்த்தார்? பரிசுத்த ஆவியானவரைக் காண முடியுமா?
இல்லை! ஆனால், வேற்று மொழியில் பேசினதையோ அல்லது தீர்க்கதரிசனம் சொல்வதை போன்ற பரிசுத்த ஆவியின் வெளிப்பாடுகளை கண்டிருக்க முடியும்.
ஆகவே – சமாரியர்கள் ஞானஸ்நானம் பெற்றபோது பரிசுத்த ஆவி அவர்களில் தங்கி தாபரிக்கும் பரிசைப் பெற்றார்கள் என்றும் “அப்போஸ்தலர்களின் கைகள்” அவர்கள் மீது வைக்கப்பட்டபோது பரிசுத்த ஆவியின் பரிசுகளை (வரங்களை) பெற்றார்கள் என்றும் அறிகிறோம். (இன்னுமொரு சம்பவம் அப். 19: 1-6)
*இந்த ஆவிக்குரிய பரிசுகளின் (வரங்களின்) நோக்கம் என்ன*?
1)
*வெளிப்படுத்துதல்*:
மனிதனுக்கு தன் படைப்பாளரிடமிருந்து ஒரு வெளிப்பாடு அவசியப்படுகிறது.
"தன் சொந்த நடவடிக்கைகளை தானே இயக்கிக்கொள்ளும் திறன் மனிதனில் இல்லை;" ஆகையால் தேவன் அறிவு மற்றும் ஞானத்தின் பரிசுகளை வழங்கினார். (எரேமியா 10:23)
2)
*பிரகடனம்*:
சரியான செய்தியை சரியான மொழியில் அறிவிக்க மனிதன் தேவை; ஆகையால் தேவன் அதற்கான பரிசுகளை வழங்கினார்:
"தீர்க்கதரிசனம்" - செய்தி.
"ஆவிகளைக் கண்டறிதல்" - சரியான செய்தி. (1யோ. 4:1)
"மொழிகளின் விளக்கம்" - சரியான மொழி.
3)
*உறுதிப்படுத்தல்*:
இன்று நமக்கிருப்பது போல ஆரம்பகால கிறிஸ்தவர்களுக்கு வேதாகமம் முழுமையானதாக இல்லை. அவர்கள் பெற்ற, மற்றும் பிரகடனப்படுத்தும் வெளிப்பாடுகள் தேவனிடத்திலிருந்து தான் வந்தது என்பதை அவர்கள் நிரூபிக்க வேண்டியிருந்தது.
இயற்கைக்கு மாறாக அற்புதங்கள் / அதிசயங்கள் நடைபெறாமல் தேவனுடைய வார்த்தையைத்தான் அவர்கள் பேசுகிறார்கள் என்பதை பார்வையாளர்களுக்கு எப்படி நிரூபிப்பது - அப். 8:6.
ஆகையால், தேவன் இப்படிப்பட்ட வரங்களை கொடுத்தார்:
நம்பிக்கை - 1 கொரி. 13:2.
குணப்படுத்துதல் - அப். 3:11.
அற்புதங்கள் – அப். 13:11.
மொழிகள் - 1 கொரி. 14:22; அப். 2:1-5.
“விசுவாசிக்கிறவர்களால் நடக்கும் அடையாளங்களாவன: என் நாமத்தினாலே பிசாசுகளைத் துரத்துவார்கள்; நவமான பாஷைகளைப் பேசுவார்கள்; சர்ப்பங்களை எடுப்பார்கள்; சாவுக்கேதுவான யாதொன்றைக் குடித்தாலும் அது அவர்களைச் சேதப்படுத்தாது; வியாதியஸ்தர்மேல் கைகளை வைப்பார்கள், அப்பொழுது அவர்கள் சொஸ்தமாவார்கள் என்றார். இவ்விதமாய்க் கர்த்தர் அவர்களுடனே பேசினபின்பு, பரலோகத்துக்கு எடுத்துக்கொள்ளப்பட்டு, தேவனுடைய வலதுபாரிசத்தில் உட்கார்ந்தார். அவர்கள் புறப்பட்டுப்போய், எங்கும் பிரசங்கம்பண்ணினார்கள். கர்த்தர் அவர்களுடனேகூடக் கிரியையை நடப்பித்து, அவர்களால் நடந்த *அடையாளங்களினாலே வசனத்தை உறுதிப்படுத்தினார்*. ஆமென்" (மாற்கு 16: 17-20)
"அடையாளங்களினாலும் அற்புதங்களினாலும் பலவிதமான பலத்த செய்கைகளினாலும், தம்முடைய சித்தத்தின்படி பகிர்ந்துகொடுத்த பரிசுத்த ஆவியின் வரங்களினாலும், தேவன் தாமே சாட்சி கொடுத்ததுமாயிருக்கிற இவ்வளவு பெரிதான இரட்சிப்பைக்குறித்து நாம் கவலையற்றிருப்போமானால் தண்டனைக்கு எப்படித் தப்பித்துக்கொள்ளுவோம்”. எபி. 2:4
முதலில் கர்த்தரால் பேசத் தொடங்கி, அவரைக் கேட்டவர்களால் நமக்கு உறுதிப்படுத்தப்பட்டது. மனுஷர்களுக்குள்ளே உறுதிபண்ணப்பட்ட உடன்படிக்கையை ஒருவனும் தள்ளுகிறதுமில்லை, அதினோடே ஒன்றையும் கூட்டுகிறதுமில்லை.
வசனம் உறுதிப்படுத்தப்படும்படியாக தேவன் அற்புதங்களை அநுக்கிரகித்தார் - அப். 3:15-16, 4:10, 14:3, 19:11-12; ரோ. 15:18-19, கலா. 3:15
*இந்த அற்புதமான ஆவிக்குரிய பரிசுகள் (வரங்கள்) எவ்வளவு காலம் நீடித்தன*?
இதற்கு பதிலளிக்க நாம் அவைகளின் (வெளிப்படுத்தல், பிரகடனம், உறுதிப்படுத்தல்) நோக்கத்தை மீண்டும் பார்க்க வேண்டும்.
வெளிப்பாடு:
தேவனிடமிருந்து ஒரு முழுமையான வெளிப்பாடு முதல் நூற்றாண்டில் அல்லது அப்போஸ்தலர்களின் வாழ்நாளில் வழங்கப்பட்டது.
யோவான் 16:13ல், பரிசுத்த ஆவியானவர் அவர்களை எல்லா சத்தியங்களிலும் வழிநடத்துவார் என்று இயேசு அப்போஸ்தலர்களுக்கு வாக்குறுதி அளித்தார்.
அதாவது எந்த சத்தியத்தையும் வெளிப்படுத்தாமல் விடாது.
இயேசு யோவான் 17:8ல், "நீர் எனக்குக் கொடுத்த வார்த்தைகளை நான் அவர்களுக்குக் கொடுத்தேன்; அவர்கள் அவைகளை ஏற்றுக்கொண்டு, நான் உம்மிடத்திலிருந்து புறப்பட்டுவந்தேன் என்று நிச்சயமாய் அறிந்து, நீர் என்னை அனுப்பினீர் என்று விசுவாசித்திருக்கிறார்கள்." என்று கூறினார்.
பவுல் எபேசியர் 3:4-6ல், "இதைக்குறித்து நான் முன்னமே சுருக்கமாய் எழுதியிருக்கிறேன். அதை நீங்கள் வாசிக்கையில் கிறிஸ்துவின் இரகசியத்தைக்குறித்து எனக்கு உண்டாயிருக்கிற அறிவை அறிந்துகொள்ளலாம்; இந்த இரகசியம் இப்பொழுது அவருடைய பரிசுத்த அப்போஸ்தலருக்கும் தீர்க்கதரிசிகளுக்கும் ஆவியானவராலே வெளிப்படுத்தப்பட்டிருக்கிறதுபோல, முற்காலங்களில் மனுபுத்திரருக்கு அறிவிக்கப்படவில்லை." என்றார்.
பரிசுத்த ஆவியானவர் அந்த இரகசியத்தை தனக்கு வெளிப்படுத்தினார் என்று பவுல் கூறினார். வெளிப்படுத்தினதை அவர் எழுதினார், அதை நாம் படித்து புரிந்து கொள்ள முடியும்.
நம்முடைய விசுவாசம் எழுதப்பட்ட வார்த்தையை அடிப்படையாகக் கொண்டது (யோ. 20:30-31).
இது முழுமையானது மற்றும் இறுதியானது (2 தீமோ. 3:16-17).
இவ்வகை தீர்க்கமான அறிக்கையானது அப்போதைய காலத்தில் உயிரோடு இருந்த அப்போஸ்தலர்கள் மற்றும் தீர்க்கதரிசிகளின் நிறைவான, முடிவான வேலையை செய்து முடித்தார்கள் என்பதை நாம் அறிய வேண்டும்.
யூதா "*ஒரு (விசை) முறை* பரிசுத்தவான்களுக்கு ஒப்புக்கொடுக்கப்பட்ட விசுவாசத்திற்காக தைரியமாக போராடுங்கள்" (வ3) என்றார்.
மீண்டும் மீண்டும் அல்ல, இரண்டாவது முறையும் அல்ல "*ஒரு முறை*" என்பது கவனிக்கவேண்டும்.
ஆகையால், தேவனிடமிருந்து ஒரு முழுமையான மற்றும் இறுதி வெளிப்பாடு நம்மிடம் கரங்களில் இருப்பதால், இனியும் ஞானம் அறிவு என்ற விசேஷ வெளிப்பாடு வேண்டும் என்ற எதிர்பார்ப்பு வேத வசனத்திற்கு ஒவ்வவில்லை. இந்த வரங்கள் அவற்றின் நோக்கத்தை நிறைவேற்றி முதல் நூற்றாண்டில் முடிக்கப்பட்டது.
பிரகடனம்:
ஆவியின் மூன்று பரிசுகள் (வரங்கள்) இந்த வகைக்குள் உள்ளன.
ஆவிகளை சோதித்து கண்டறியும் திறன்:
யோவான், "உலகத்தில் அநேகங்கள்ளத்தீர்க்கதரிசிகள் தோன்றியிருப்பதினால், நீங்கள் எல்லா ஆவிகளையும் நம்பாமல், அந்த ஆவிகள் தேவனால் உண்டானவைகளோ என்று சோதித்தறியுங்கள்" என்றார் (1 யோ. 4:1)
எந்த ஊழியனும் தேவனுடைய வார்த்தை என்று பிரகடனப்படுத்திக்கொண்டு மேடையிலோ நம்மிடமோ பேசுவது தேவ வார்த்தையா அல்லது தன் சொந்த கற்பனையை அல்லது தவறான போதகத்தை கற்றுக்கொடுக்கிறார்களா என்பதை நாம் கண்டுபிடிக்க பிரத்யேகமாக கண்களை மூடிக்கொண்டோ வித்தியாசமான முயற்சிகளையோ நாடி கண்டு பிடிக்க இப்போது அவசியமில்லை !!
ஏனென்றால் – நம் இரட்சிப்பிற்கும் பரலோகத்திற்கும் போய் சேர வேண்டிய அவசியமான சகல தேவனுடைய வார்த்தையையும் முழுவதும் எழுதப்பட்டு நம் கரங்களில் சகலமும் கொடுக்கப்பட்டிருப்பதை (வேதத்தின் மூலம்) ஒப்பிட்டு பார்த்தால் - நாம் கேட்ட செய்தியை தேவனுடையது தானா என்று சோதித்து அறிய முடியும் போது - கண்டறியும் ஸ்பெஷல் வரம் இன்று நமக்குத் அவசியப்படுகிறதா? அவசியமேயில்லை என்பதை உணரவேண்டும். வெளி. 22:18,19.
மொழிகளின் விளக்கம்:
சபை நிறுவப்பட்ட 29 ஆண்டுகளுக்குள் ஒவ்வொரு தேசத்திலும் ஒவ்வொரு உயிரினத்திற்கும் சுவிசேஷம் பிரசங்கிக்கப்பட்டது - கொலோ. 1:6, 23
தேவனுடைய செய்தியை அவர்களின் சொந்த மொழியில் மொழிபெயர்த்து சொல்லும் திறன் வேதாகமம் இல்லாத அந்த காலங்களிலேயே இதை சாத்தியமாக்க உதவியது.
தீர்க்கதரிசனம்.
தீர்க்கதரிசனம் என்பது "இயல்பான வழிமுறைகளால் அறிய முடியாததை அறிவிப்பதாகும். அதாவது தேவனுடைய மனதையும் ஆலோசனையையும் பேசுவது தீர்க்கதரிசனம்"
வேத பதிவுகள் முழுமையடைந்த பின்னர் – அதற்கான அவசியம் இல்லாமல் போனது. வேதாகமம் அந்த இடத்தை பிடித்திருக்கிறார். - 1 கொரி. 13:8,9
2 பேதுரு 2:1ல் குறிப்பிடத்தக்க மாற்றத்தைக் கவனியுங்கள்.
வித்தியாசம் என்னவென்றால், தீர்க்கதரிசியின் செய்தி சந்தர்ப்பத்திற்காக தேவனுடைய மனதை நேரடியாக வெளிப்படுத்தியிருந்தாலும், எழுத்து ஆசிரியரின் செய்தியோ வேதங்களில் உள்ள முழுமையான வெளிப்பாட்டிலிருந்து சேகரிக்கப்படுகிறது. மனிதனின் இரட்சிப்பிற்கு வேண்டிய தேவனுடைய வார்த்தை முழுவதும் எழுதி முடித்துவைக்கப்பட்டுள்ளது. புதியதாக ஒன்றை கூட்டுவதோ திருத்துவதோ சாபத்திற்குள்ளாக்குகிறது என்பதை திண்ணமாக அறியவேண்டும். தீர்க்கதரிசனத்தில் தேவன் ஒன்றை வெளிப்படுத்தினார் என்று ஒருவர் சொல்வாராகில் – அது வேதத்தில் எழுதிய ஒன்றாக தான் இருக்க வேண்டும். கலா. 1:8, வெளி. 22:18-19, கலா. 1:9, 1கொரி. 16:22, 2கொரி. 11:13-14, 1தீமோ. 1:19-20, தீத்து 3:10
உறுதிப்படுத்தல்:
தேவ மனிதர்கள் தேவனிடமிருந்து ஒரு வெளிப்பாட்டைப் பெற்றபோதும் அதை அறிவிப்பதற்கான திறன் கொடுக்கப்பட்டபோதும் அந்த செய்தி தேவனிடத்திலிருந்து வருகிறதை உறுதிப்படுத்த, தேவன் மலைகளை பெயர்க்கக்கூடிய "விசுவாசத்தை" பரிசுகளை /வரங்களையும் (1 கொரி. 13:2), "குணப்படுத்துவதற்கான" பரிசுகளை /வரங்களையும் (அப். 3:11), "அற்புதங்களை" செய்யும் திறன் (அப். 13:11), மற்றும் அவிசுவாசிகளுக்கு அடையாளமாக இருக்கும்படி பிற "மொழிகளில்" பேசும் திறன்களை வழங்கினார். (1 கொரி. 14:22)
இந்த பரிசுகள்/வரங்கள் அனைத்தும் அவர்கள் கற்பித்த செய்தியை பதியவும் உறுதிப்படுத்தப்படவும் அவசியப்பட்டது.
அவ்வாறு தேவ செய்தி வெளிவந்ததும், பிரகடனப்படுத்தப்பட்டதும், உறுதிப்படுத்தப்பட்டதுமாகையால் இனி இந்த பரிசுகளுக்கு / வரங்களுக்கு மேலும் அவசியமில்லாமல் போனது. தேவ செய்தியானது முதல் நூற்றாண்டில் வெளிப்படுத்தப்பட்டது, அறிவிக்கப்பட்டது மற்றும் உறுதிப்படுத்தப்பட்டது. (மாற்கு 16:17-20; எபி. 2:3; கலா. 3:15).
ஆதலால் தான் எந்தவொரு மனிதனும் எழுதப்பட்டிராத ஒரு புதிய செய்தியைப் பிரசங்கித்தால், அவர் "சபிக்கப்பட்டவர்"; அவர் "தேவனையுடையவர் அல்ல." (கலாத்தியர் 1: 7-8; 2 யோ. 9)
*இந்த அற்புதமான ஆவிக்குரிய பரிசுகள் / வரங்கள் எவ்வளவு காலம் நீடித்தன*?
"நிறைவானது வரும் வரை” நீடித்திருந்தது (1 கொரி. 13:10)
வரங்களின் நோக்கம் மற்றும் கொடுக்கப்பட்டவைகளின் தீர்க்கம் நிறைவேறியது என்ற உண்மையைப் பார்க்கும்போது, இதற்கான அவசியமானது அப்போஸ்தலர்கள் மற்றும் தீர்க்கதரிசிகளின் மரணத்தோடும், வரங்களை அப்போஸ்தலர்கள் கை வைத்ததன் மூலம் பெற்றுக்கொண்டவர்கள் மரணத்தோடும் முடிவுக்கு வந்தது என்றே சொல்லமுடியும்.
"தீர்க்கதரிசனங்களானாலும் ஒழிந்துபோம், அந்நிய பாஷைகளானாலும் ஓய்ந்துபோகும், அறிவானாலும் ஒழிந்துபோம். ஏனென்றால், நாம் ஓரளவு (குறைவாக) அறிந்திருக்கிறோம், ஓரளவு (குறைவாக) தீர்க்கதரிசனம் கூறுகிறோம். ஆனால் பரிபூரணமானது வரும்போது, ஓரளவு என்ற அந்த குறைவானது நீக்கப்படும்" (1 கொரி. 13:8-10). இந்த வசனத்தை ஆங்கில NIV மொழிபெயர்ப்பில் வாசிக்கும்போது இன்னும் தெளிவுபடுவீர்கள். 8Love never fails. But where there are prophecies, they will cease; where there are tongues, they will be stilled; where there is knowledge, it will pass away. 9For we know in part and we prophesy in part, 10but when completeness comes, what is in part disappears.
ஒன்பது பரிசுகளையும் (வரங்களையும்) 12 ஆம் அத்தியாயத்திலிருந்து 13ம் அத்தியாயத்திற்குக் எடுத்துச்செல்லப்படவில்லை என்பதை இங்கே கவனிக்கிறோம். எழுதப்பட்ட காலத்தில் அதிகாரங்களாக எழுதப்படவில்லை. ஆனால் அடுத்த தலைப்பின் கீழ் என்ற அர்த்தத்தில் காணும்போது இவைகள் முழுவதுமாக எடுத்துச்செல்லப்படவில்லை.
பவுல் மூன்று வகைகளை மட்டுமே கொண்டுவருகிறார்.
தீர்க்கதரிசனங்கள்: வார்த்தையின் பிரகடனத்துடன் தொடர்புடையது.
மொழிகள்: வார்த்தையின் உறுதிப்படுத்தலுடன் செய்ய வேண்டியது.
அறிவு: வார்த்தையின் வெளிப்பாட்டுடன் தொடர்புடையது.
இது ஒன்பது பரிசுகளையும் /வரங்களையும் உள்ளடக்கியது என்று நான் புரிந்துகொள்கிறேன்.
"சரியானது" (நிறைவானது) வரும்போது இந்த பரிசுகள் (வரங்கள்) நிறுத்தப்படும் என்பதை புரிந்துகொள்கிறோம். அப்படியென்றால் எது சரியானது / நிறைவானது / பூரணமானது?
*அன்பு :*
இந்த 1கொரி. 13ம் அத்தியாயத்தின் ஆதிக்கம் செலுத்தும் கருப்பொருளின் காரணமாக சிலர் அன்பு முதன்மை பெற்றதாக கூறுகிறார்கள். ஒரு விமர்சன பார்வையில் பார்த்தால், அது அர்த்தமல்ல. அப்போஸ்தலன் பவுலுக்கு அன்பு இல்லையா? இந்த ஆன்மீக பரிசுகளையும் அவர் கொண்டிருக்கவில்லையா? அந்த நேரத்தில் பலருக்கு அன்பும், ஆவிக்குரிய பரிசுகளும் இருந்தன.
அன்பு என்பது புதிய கட்டளை. (யோ. 13:34-35) அன்பு இல்லாமல் நாம் தேவனை அறிய மாட்டோம். (1 யோ. 4:7-8) அன்பு என்பது நாம் தேவனுடைய பிள்ளை என்பதற்கும் ஆத்தும வாழ்க்கைக்கும் சான்றாகும். (1 யோ. 4:10-14)
ஆவிக்குரிய வரங்கள் முடிவுறுவதற்கு முன்பு, அவர்களது முழுமையான அன்பை எதிர்பார்த்து தேவன் காத்திருக்கவில்லை! ஆனால் அவர் "நிறைவானதற்காக" காத்திருந்தார்.
இன்று அன்பு என்று எழுதிவைத்து தான் நாம் படித்துக்கொண்டிருக்கிறோம். ஒரு சின்ன வார்த்தையை கூட பொருக்கமுடியாமல் ஒரு வினாடியில் வெடிக்கும் கிறிஸ்தவர் எத்தனை பேர் ?? அன்பு இருந்தால் விரோதம் வருமோ ? அன்பு இருந்தால் கோபம் வருமோ ?
*கிறிஸ்து:*
கிறிஸ்து பரிபூரணர். சிலர் கிறிஸ்து திரும்பி வரும்போது இந்த வரங்கள்/பரிசுகள் நின்றுவிடும் என்று கூறுகிறார்கள்.
பின்வருவனவற்றால் இது உண்மை இல்லை என்பது நாம் அறியமுடியும்.
சிலவைகள் நின்றுவிடுகின்றன (ஆவிக்குரிய பரிசுகள்) சிலவைகள் மீதமுள்ளன (நம்பிக்கை, விசுவாசம் மற்றும் அன்பு - 1 கொரி. 13:13).
இந்த பரிசுகளைப்/வரங்களைப் பற்றி கொரிந்தியர் ஒருவருக்கொருவர் பொறாமைப்பட்டனர். ஆகவே நீங்கள் ஒரு தற்காலிக இயல்புடைய ஒன்றை விரும்புகிறீர்கள் என்று பவுல் கூறினார்.
விசுவாசம், நம்பிக்கை மற்றும் அன்பு ஆகிய நிலைத்திருக்கும் விஷயங்களைத் தேட வேண்டும் என்றார்.
ஆகவே கிறிஸ்து திரும்பும் வரை விசுவாசமும் நம்பிக்கையும் அன்பும் தொடரும்.
வேதங்களின் முழுமையையும் நிறைவையும் சுட்டிக்காட்டும் பல வசனங்கள் உள்ளன. 2 தீமோ. 3:16-17)
இந்த அறிக்கை (2 தீமோ. 3:16-17) அப்போதைய உயிருள்ள அப்போஸ்தலர்கள் மற்றும் தீர்க்கதரிசிகளின் மீதமுள்ள வேலைகளை உள்ளடக்கியதாக இருக்கும் என்று நான் நம்புகிறேன்.
அப்போஸ்தலன் யோவான் வேதவசனங்களுக்கு அந்த இறுதித் தொடர்பைக் கொடுத்தார். (வெளி. 22:18-21)
ஆகவே – நிறைவாக:
ஒருவர் ஞானஸ்நானம் பெற்றபோது பாவங்கள் அனைத்தும் மன்னிக்கப்படுகிறது; ஒருபோதும் பாவம் செய்யாதது போல் தேவன் நம்மை உருவாக்குகிறார் (2 கொரி. 5:21; ரோமர் 6: 3-4)
வெளிச்சத்தில் நடக்கும்போது அவருடைய இரத்தம் பாவத்திலிருந்து தூய்மைப்படுத்துகிறது. (1யோவான் 1:7)
ஈராயிரம் ஆண்டுகளுக்கு முன்பு இயேசு நமக்கு ஒரு இடத்தைத் ஆயத்தப்படுத்த பரலோகத்திற்குச் சென்றார். (யோ. 14:1-3) இப்போது முன்பதிவு செய்யப்பட்டுள்ளது. (1பேதுரு 1:3-5) இது நமக்கு "அழியாத, வரையறுக்கப்படாத, மங்காத, பரலோகத்தில் ஒதுக்கப்பட்ட ஒரு இடம்".
அவர் சொன்னார், நாம் "தேவனுடைய ராஜ்யத்தையும் அவருடைய நீதியையும் முதலில் நாடினால்" உணவு, தங்குமிடம் மற்றும் ஆடை பற்றி நான் கவலைப்பட வேண்டியதில்லை, இவை கூடவே சேர்த்து வழங்கப்படும்”. (மத்தேயு 6:33)
நம் பலத்திற்கு மேலே நம்மை சோதிக்க அவர் அனுமதிக்க மாட்டார். (1 கொரி. 10:13) அவர் ஒருபோதும், ஒருபோதும், ஒருபோதும் நம்மை விட்டு விலக மாட்டார். (எபிரெயர் 13:5)
நாம் தொடர்ந்து அவரை நேசித்தால் அவர் நம் நன்மைக்காக எல்லாவற்றையும் செய்வார். (ரோமர் 8:28)
ரோமர் 8:32ன்படி இவை அனைத்தும் உண்மை என்று நமக்குத் தெரியும்.
இந்த விஷயங்களை புறக்கணித்து, சபையின் ஆரம்ப பருவத்தில் தேவைப்பட்ட அந்த "குழந்தைத்தனமான விஷயங்களுக்கு" திரும்பிச் செல்வோரில் தரமில்லாத ஆத்தும வாழ்க்கை. நாம் ஆண்களைப் போல செயல்பட வேண்டும், குழந்தைத்தனமான விஷயங்களை ஒதுக்கி வைக்க வேண்டும். (1 கொரிந்தியர் 13:11)
*அப்படியென்றால் அற்புதங்கள் இன்று நிகழ்கிறதா*?
நாம் அற்புதத்தின் தேவனை தொழுது கொள்கிறோம். அவர் அற்புதம் செய்ய எப்போதும் வல்லவர். நம் தேவன் அற்புதங்களை இனி செய்ய மாட்டார் என்று சொல்வதற்கு எவருக்கு அதிகாரம் உள்ளது?
அற்புதம் என்பது பெற்றுக்கொள்பவருக்கும் கொடுக்கும் தேவனுக்கும் இடையில் நடப்பது.
வேதாகமத்தில் நாம் பார்த்த அற்புதங்கள் அனைத்தும் கீழ்கண்ட கோட்பாடுகள் இருந்தது.
1-இயற்கைக்கு மாறாக இருந்தது (எ.கா. : கடல் கொந்தளிப்பை அடக்கியது, 5,000 பேருக்கு போஜனம் கொடுத்து போன்றவை)
2-உடனடியாக நடந்தது
3-பதிவு செய்யப்பட்டது
4-சாட்சிகள் இருந்தது
5-பொது ஜனங்கள் மத்தியில் நடந்தது.
இக்காலங்களில் அற்புதம் நடந்ததாக சொல்பவைகளை “உங்களுடைய நிதானத்திற்கு விடுகிறேன்”. மேலே கூறப்பட்ட விதிகளை கொண்டுள்ளதா என்பதை நீங்கள் நிதானிக்க வேண்டும்.
வேதத்தை ஆராய்ந்து அறியுங்கள்.
வேதத்தில் இல்லாதவற்றிற்கு செவி சாய்ப்பது நம் நித்திய வாழ்க்கையையே கேள்விக்குறியாக்கிவிடும்.
** வேக வேகமாக படித்திருக்கமாட்டீர்கள் என்று நம்புகிறேன் **
*எடி ஜோயல் சில்ஸ்பி*
ஊழியர் - கணியாகுளம் கிறிஸ்துவின் சபை,
வேதாகம ஆசிரியர்
தொடர்பு : +91 81 44 77 6229
*Q&A Book ஆர்டர் செய்ய* : https://kaniyakulamcoc.blogspot.com/2023/02/qr-code-link-for-q-book-payment.html
*Q&A Biblical வாட்ஸப்குழுவில் இணைய* க்ளிக் செய்யவும் : https://chat.whatsapp.com/Lu8jhEd4Sag5XMhtNqGXi2
வலைதளம் : http://www.kaniyakulamcoc.wordpress.com
YouTube “வேதம் அறிவோம்” :
https://www.youtube.com/joelsilsbee
*----*----*----*----*----*-----*
கருத்துகள் இல்லை:
கருத்துரையிடுக