#1255 - ஒரு மனிதன் பிசாசுக்கு இடம் கொடுப்பதால் அவனுக்குள் பிசாசு புகுந்து விடுகிறது. ஒரு மிருகத்துக்குள்ளோ அல்லது பறவைக்குள்ளோ செல்ல முடியுமா?

#1255 - *ஒரு மனிதன் பிசாசுக்கு இடம் கொடுப்பதால் அவனுக்குள் பிசாசு புகுந்து விடுகிறது. ஒரு மிருகத்துக்குள்ளோ அல்லது பறவைக்குள்ளோ செல்ல முடியுமா?*

*பதில்* : மிருகத்திற்குள் பிசாசு புகுந்ததற்கான ஆதாரத்தை நாம் மத்தேயு 8:31-32ல் காணலாம். 

பிசாசுகள் மனிதர்களுக்குள் மட்டுமல்ல, பன்றிகள் போன்ற மிருகங்களுக்குள்ளும் கிறிஸ்து இப்பூமியில் வாழ்ந்திருந்த காலத்தில் புகுந்ததாக வேதாகமம் தெளிவாகக் கூறுகிறது.

வெளிப்படுத்தின விசேஷம் 18:2-ல் பாபிலோன் பற்றிக் கூறும்போது, “அது பிசாசுகளின் குடியிருப்பும், சகலவித அசுத்த ஆவிகளின் காவல்வீடும், சகலவித அசுத்தமும் அருவருப்புமுள்ள பறவைகளின் கூடுமாயிற்று” என்ற வரிகளை கண்டாலும், அது ஒரு ஒப்பனை. 

கூடுதல் தகவலாக இதையும் எழுத வேண்டிய பொறுப்பு எனக்கு உள்ளது.

மனிதனுக்குள் பிசாசு புகுவதற்கும், பிசாசுக்கு இடம்கொடுப்பதற்கும் என்ன தொடர்பு?

எபேசியர் 4:27: பிசாசுக்கு இடங்கொடாமலும் இருங்கள் என்று பவுல் எழுதுகிறார். 

பிசாசுக்கு இடம்கொடுப்பது என்றால் அவன் நிச்சயமாக ஒருவருக்குள் புகுந்துவிடுவான் என்ற அர்த்தம் அல்ல. எண்ணங்களில் தூய்மையாய் இருப்பதைக் குறித்து சொல்கிறது. 

அதாவது, 

இரட்சிக்கப்பட்டவர்கள், தங்கள் பரிசுத்தத்தில் மென்மேலும் வளர்வதை விட்டு, நமது இருதயத்தை கலங்கம் பண்ணி சூழலுக்கேற்ற பொய் பேசுவது, மற்றவர்களைக்குறித்த சிந்தனைகளின் மூலம் சொந்த இருதயத்தில் கசப்பு வளர்த்திக்கொள்தல், கோபத்தினால் தகாத வார்த்தைகளையும் தீய வார்த்தைகளையும் பிரயோகித்தல், வேலைசெய்ய திராணியும் சமயமும் இருந்தும், சுயமாய் வேலை செய்து அதிலிருந்து குறைச்சலுள்ள மற்றவர்களுக்கு கொடுப்பதை விட்டு, வேறொருவரிடம் வாங்கி நிறைவேற்றுவது போன்றவற்றை பவுல் இங்கே குறிப்பிடுகிறார். எபே. 4:22-31

யோவான் 13:27 மற்றும் லூக்கா 22:3-ம் வசனங்களில், யூதாஸ்காரியோத்துக்குள் சாத்தான் புகுந்ததாகக் கூறப்படுகிறது.

எனவே, பிசாசுக்கு இடம்கொடுப்பது மற்றும் ஒருவருக்குள் பிசாசு புகுவது ஆகியவற்றை வேதாகமம் ஒரே பொருளில் எல்லா இடங்களிலும் பயன்படுத்தவில்லை.

இந்த தலைப்பிற்கு கூடுதல் தகவலாக வேறொருவர் கேட்ட கீழ்கண்ட கேள்வியையும் நீங்கள் வாசிக்கலாம்.

#463 - இறந்த மனிதர்களின் ஆத்மா பரதீசு/பாதளம் சென்றுவிடும், இந்த பூமியில் இருக்காது. பிறகு எப்படி பிசாசு பிடித்த அனேகரை ஆண்டவராகிய இயேசு கிறிஸ்துவும், அப்போஸ்தலர்களும் விரட்டினார்களே இவைகள் எவ்வகையான பிசாசுகள்?  எத்தனை வகையான பிசாசுகள் மற்றும் ஆவிகள் உள்ளன?  பிசாசுகள் மற்றும் ஆவிகள் என்றால் என்ன?  - என்ற கேள்விக்கான பதிலை நமது வலைதளத்திலிருந்து வாசிக்கவும்.

*எடி ஜோயல் சில்ஸ்பி*
ஊழியர் - கணியாகுளம் கிறிஸ்துவின் சபை,
வேதாகம ஆசிரியர்
தொடர்பு : +91 81 44 77 6229
    
*Q&A Biblical வாட்ஸப்குழுவில் இணைய* க்ளிக் செய்யவும் :
https://chat.whatsapp.com/Lu8jhEd4Sag5XMhtNqGXi2

*Q&A Book ஆர்டர் செய்ய* :
kaniyakulamcoc.blogspot.com/2023/02/qr-code-link-for-q-book-payment.html

வலைதளம் :
kaniyakulamcoc.wordpress.com

YouTube “வேதம் அறிவோம்” :
https://www.youtube.com/joelsilsbee

*----*----*----*----*----*-----*

#1254 – கிறிஸ்தவர்கள் தங்கள் பிறந்த நாளைக் கொண்டாடலாமா?

*#1254 – கிறிஸ்தவர்கள் தங்கள் பிறந்த நாளைக் கொண்டாடலாமா?*

 

*பதில்*: ஆயிரம் வருட அரசாட்சி, உயிர்த்தெழுந்த இயேசு கிறிஸ்து ஆவிக்குரிய சரீரத்தில் எழுந்தார், பரிசுத்த ஆவியானவர் ஒரு நபர் அல்ல போன்ற கருத்துகள் யெகோவாவின் சாட்சிகள் அமைப்பின் போதனைகளில் காணப்படுகின்றன. இவற்றைப் போலவே, பிறந்த நாளைக் கொண்டாடுவதும் மெழுகுவர்த்தியை ஊதி அணைப்பதும் புறமதப் பழக்கவழக்கங்களிலிருந்து வந்தவை என்றும், ஆகவே கிறிஸ்தவர்கள் தங்கள் பிறந்த நாளைக் கொண்டாடக்கூடாது என்றும் அவர்கள் போதிக்கின்றனர்.

 

ஆனால், வேதாகமத்தின்படி பிறந்த நாளைக் கொண்டாடக்கூடாது என்று நேரடியாகத் தடைசெய்யும் வசனம் எதுவும் இல்லை. பிறந்த நாளைக் கொண்டாடுவது குறித்துத் தீர்மானிக்கும்போது, வேதாகமம் என்ன சொல்கிறது என்பதையும், அதில் நாம் எவ்வாறு தேவனை மகிமைப்படுத்துகிறோம் என்பதையும் கவனத்தில் கொள்ள வேண்டும்.

 

வேதாகமத்தில் பிறந்த நாளைக் குறித்துச் சில பதிவுகள் காணப்படுகின்றன.

 

*1- பார்வோனின் பிறந்த நாள் – ஆதியாகமம் 40:20–22*

அவன் தனது பிறந்த நாளில் விருந்து வைத்தான். அப்போது பானபாத்திரக்காரரின் தலைவனை மீண்டும் அவனுடைய பதவியில் அமர்த்தினான்; அப்பம் சுடுகிறவர்களின் தலைவனையோ தூக்கிலிட்டான்.

 

இங்கே பிறந்த நாள் கொண்டாடப்பட்டதாகப் பதிவு செய்யப்பட்டுள்ளது. ஆனால், அந்த நாளில் நிகழ்ந்த சம்பவங்கள் பிறந்த நாளைக் கொண்டாடுவது தவறு என்பதை நிரூபிக்கவில்லை.

 

*2- ஏரோது ராஜாவின் பிறந்த நாள் – மத்தேயு 14:6–11; மாற்கு 6:21–28*

ஏரோதுவின் பிறந்த நாள் விருந்தின்போது, ஏரோதியாளின் மகளுடைய வேண்டுகோளின்படி யோவான் ஸ்நானனின் தலை வெட்டப்பட்டது.

 

இந்தக் கொடூரமான தீய செயல் பிறந்த நாள் கொண்டாடப்பட்டதால் ஏற்பட்டது என்று வேதாகமம் கூறவில்லை. எனவே, இந்த நிகழ்வை மட்டும் அடிப்படையாகக் கொண்டு எல்லாப் பிறந்த நாள் கொண்டாட்டங்களும் தவறானவை என்று முடிவு செய்ய முடியாது.

 

*3- யோபுவின் குமாரர்களின் விருந்துகள் – யோபு 1:4–5*

யோபுவின் குமாரர்கள் தங்கள் தங்கள் நாளில் விருந்து செய்து மகிழ்ந்தார்கள். அவர்கள் விருந்து முடிந்தபின், தங்கள் பிள்ளைகள் பாவம் செய்து, இருதயத்தில் தேவனைத் தூஷித்திருக்கக்கூடும் என்று எண்ணி, யோபு அவர்களுக்காகச் சர்வாங்க தகனபலிகளைச் செலுத்தினான்.

 

இங்கே குறிப்பிடப்படுவது பிறந்த நாள் கொண்டாட்டம் என்று வசனம் நேரடியாகக் கூறவில்லை. எனவே, இந்தப் பகுதியை பிறந்த நாள் கொண்டாட்டத்திற்கு ஆதரவாகவோ எதிராகவோ திட்டவட்டமான சான்றாகக் கொள்ள முடியாது.

 

தேவன் நம் வாழ்க்கையின் முக்கியமான தருணங்களை நினைவுகூரச் செய்கிறார். வேதாகமத்தில் தேவன் தமது மக்களுடைய வாழ்க்கையில் முக்கியமான தருணங்களில் அவர்களுக்குத் தம்முடைய வாக்குறுதிகளையும் வழிநடத்துதலையும் வெளிப்படுத்தியதைப் பார்க்கிறோம்.

 

*ஆபிரகாமின் வாழ்க்கையில்:*

75-ஆம் வயதில், ஆபிராம் ஆரானை விட்டுப் புறப்பட்டுச் செல்லும்படி தேவன் அழைத்து, அவரைப் பெரிய ஜாதியாக்குவதாக வாக்குறுதி அளித்தார். ஆதி. 12:1–4

 

99-ஆம் வயதில், தேவன் ஆபிராமுக்குத் தரிசனமாகி, தமக்கு முன்பாக நடந்து உத்தமனாயிருக்கும்படி கூறினார். விருத்தசேதன உடன்படிக்கையை ஏற்படுத்தி, அவருடைய பெயரை ஆபிரகாம் என்று மாற்றினார். மேலும், சாராள் ஒரு மகனைப் பெறுவாள் என்றும் வாக்குறுதி அளித்தார். ஆதி. 17:1–21

 

இந்த வசனங்கள் பிறந்த நாளைக் கொண்டாடுவதைக் குறித்துப் பேசவில்லை. இருப்பினும், நம் வாழ்க்கையில் தேவன் செய்த நன்மைகளையும் அவர் அளித்த கிருபையையும் நினைவுகூர்ந்து அவருக்கு நன்றி செலுத்துவது தவறானதல்ல என்பதைப் புரிந்துகொள்ளலாம்.

 

*பிறந்த நாளைக் கொண்டாடுவது தவறா?*

கர்த்தருடைய நாளாகிய வாரத்தின் முதல் நாளில் நடைபெறும் தொழுகைக்கு உரிய முக்கியத்துவத்தைக் குறைக்காமல், ஒருவர் தனது பிறந்த நாளன்று தன்னைப் படைத்து, இதுவரை வாழ வைத்த தேவனுடைய கிருபைக்காக அவருக்கு நன்றி செலுத்துவதில் என்ன தவறு இருக்கிறது?

 

என்னைப் பொறுத்தவரையில், பிறந்த நாளைக் கொண்டாடுவதில் தவறு இல்லை. ஆனால், அந்தக் கொண்டாட்டம் தேவனுக்குப் பிரியமானதாக இருக்க வேண்டும்.

 

*அப்போஸ்தலனாகிய பவுல் கூறுகிறார்:*

 1 கொரிந்தியர் 10:31 – “ஆகையால் நீங்கள் புசித்தாலும், குடித்தாலும், எதைச் செய்தாலும், எல்லாவற்றையும் தேவனுடைய மகிமைக்கென்று செய்யுங்கள்.”

 

பிறந்த நாள் விழாவானது நாம் செய்யும் எல்லாக் காரியங்களும் தேவனை மகிமைப்படுத்துவதாக இருக்க வேண்டும். ஒழுக்கக்கேடான எந்தச் செயல்களுக்கும் இடமளிக்கும் இருக்கவேண்டும்.

 

கொலோசெயர் 3:17 - “வார்த்தையினாலாவது கிரியையினாலாவது, நீங்கள் எதைச் செய்தாலும், அதையெல்லாம் கர்த்தராகிய இயேசுவின் நாமத்தினாலே செய்து, அவர் முன்னிலையாகப் பிதாவாகிய தேவனை ஸ்தோத்திரியுங்கள்.”

 

கொலோசெயர் 3:23–24 - “நீங்கள் எதைச் செய்தாலும், அதை மனுஷர்களுக்கென்று செய்யாமல், கர்த்தருக்கென்றே மனப்பூர்வமாய்ச் செய்யுங்கள்.”

 

எனவே, ஒருவர் பிறந்த நாளைக் கொண்டாடுகிறாரா இல்லையா என்பதைவிட, அவர் செய்யும் அனைத்திலும் தேவனை எவ்வாறு மகிமைப்படுத்துகிறார் என்பதே முக்கியமானது.

 

பிறந்த நாளைக் கொண்டாடக்கூடாது என்று வேதாகமம் நேரடியாகத் தடை விதிக்கவில்லை. அதேவேளையில், பிறந்த நாளைக் கட்டாயமாகக் கொண்டாட வேண்டும் என்றும் வேதாகமம் கட்டளையிடவில்லை. 

*எடி ஜோயல் சில்ஸ்பி*

கர்த்தருடைய ஊழியன்,

கிறிஸ்துவின் சபை, கணியாகுளம்

தொடர்பு : +918144776229 (India) 

 

வலைதளம் : kaniyakulamcoc.blogspot.com

*கேள்வியும் வேதாகம பதில்களும் Whatsapp (Locked) குழுவில் இணைய* :

https://chat.whatsapp.com/DdQM79dFf5v6GQMRfbDc2H

#1253 - உன் பாவம் உனக்கு மன்னிக்கப்பட்டது என்ற நேரடியாய் சொன்ன இயேசு கிறிஸ்து, சிலுவையில் தொங்கும் போது தன்னை துன்புறுத்தியவர்களை மன்னிக்கும்படி பிதாவினிடத்தில் வேண்டுவது ஏன்?

#1253 - *உன் பாவம் உனக்கு மன்னிக்கப்பட்டது என்ற நேரடியாய் சொன்ன இயேசு கிறிஸ்து, சிலுவையில்  தொங்கும் போது தன்னை துன்புறுத்தியவர்களை மன்னிக்கும்படி பிதாவினிடத்தில் வேண்டுவது ஏன்*?

 

*பதில்* : பூலோகத்தில் ஊழியம் செய்தபோது, "பூமியிலே பாவங்களை மன்னிக்க மனுஷகுமாரனுக்கு அதிகாரம் உண்டு" (மத். 9:2, மாற்கு 2:5-10, லூக்கா 7:48) என்பதை இயேசு கிறிஸ்து வெளிப்படுத்தினார். 

 

அவர் தேவனாகவும் மேசியாவாகவும் இருந்ததால், தன் அதிகாரத்தினால் மனிதர்களின் பாவங்களை நேரடியாக மன்னித்தார்.

 

1 தீமோத்தேயு 2:5 இயேசுவை தேவனுக்கும் மனிதருக்கும் இடையிலான மத்தியஸ்தராகக் குறிப்பிடுகிறது. ஆனால், இயேசு மத்தியஸ்தராக இருந்ததால் பாவங்களை மன்னிக்க அவரால் நேரடியாக முடியாது என்றோ, மன்னிக்க வேண்டுமென்றால் பிதாவிடம் கட்டாயம் கேட்க வேண்டும் என்றோ வேதாகமம் கூறவில்லை.

 

இயேசு பாவங்களை மன்னிக்கும் அதிகாரமுடையவர் என்பதற்கும், பிதாவிடம் தம்மைத் துன்புறுத்தியவர்களுக்காக வேண்டினார் என்பதற்கும் முரண்பாடு இல்லை. இங்கு அவர் தம்மைத் துன்புறுத்தியவர்கள்மீது இரக்கம் காட்டி, அவர்களுக்காகப் பரிந்து வேண்டுகிறார்.

 

எனவே, இயேசு பாவங்களை மன்னிக்கும் அதிகாரமற்றவர் என்பதால் பிதாவிடம் வேண்டவில்லை; மாறாக, தம்மைத் துன்புறுத்தியவர்கள்மீது அன்பும் இரக்கமும் கொண்டு அவர்களுக்காக வேண்டினார் என்பதே முக்கியமான கருத்து.

*எடி ஜோயல் சில்ஸ்பி*

ஊழியர் - கணியாகுளம் கிறிஸ்துவின் சபை,

வேதாகம ஆசிரியர்

தொடர்பு : +91 81 44 77 6229

    

*Q&A Biblical வாட்ஸப்குழுவில் இணைய க்ளிக் செய்ய வேண்டிய லிங்க்:* https://chat.whatsapp.com/Lu8jhEd4Sag5XMhtNqGXi2

எங்களது வலைதளம் : http://www.kaniyakulamcoc.wordpress.com

எங்களது YouTube Channel பெயர் "வேதம் அறிவோம்” https://www.youtube.com/joelsilsbee

-------------------------*

#1252 - வேதாகமத்தின்படி வயதில் மூத்தவர்களை அப்பா என்று கூப்பிடலாமா?

 #1252 - *வேதாகமத்தின்படி வயதில் மூத்தவர்களை அப்பா என்று கூப்பிடலாமா?* 
 
*பதில்* : வேதாகமத்தின்படி வயதில் மூத்தவர்களை “அப்பா” என்று அழைப்பது தவறு என்று சொல்ல முடியாது.
 
மத்தேயு 23:9-ல் இயேசு, “பூமியிலே ஒருவனையும் உங்கள் பிதா என்று சொல்லாதிருங்கள்” என்று கூறியிருக்கிறார். ஆனால் இந்த வசனத்தை மட்டும் வைத்து யாரையும் அப்பா என்று அழைக்கக்கூடாது என்று முடிவு செய்ய முடியாது. அதன் சூழலையும் பார்க்க வேண்டும்.
 
மத்தேயு 23:5–12-ல், மனிதர்களால் காணப்படுவதற்காகச் செயல்படுதல், உயர்ந்த இடங்களையும் பட்டங்களையும் விரும்புதல், மனிதர்களிடமிருந்து மதிப்பையும் மேன்மையையும் எதிர்பார்த்தல் ஆகியவற்றை இயேசு கண்டிக்கிறார்.
எனவே, மத்தேயு 23:9-ன் முக்கியமான நோக்கம், மனிதர்களை இறைவனுக்கு இணையான அதிகாரமுள்ளவர்களாக உயர்த்தி, அவர்களுக்கு ஆவிக்குரிய மேன்மையையும் இறுதி அதிகாரத்தையும் வழங்கக்கூடாது என்பதாகும்.
 
2 இராஜாக்கள் 2:12-ல் எலிசா, எலியாவை “என் தகப்பனே” என்று அழைக்கிறார். அதேபோல், 1 கொரிந்தியர் 4:15-ல் பவுல், கொரிந்திய விசுவாசிகளைச் சுவிசேஷத்தினால் பெற்றதால் அவர்களுக்குத் தகப்பனாக இருப்பதாகக் கூறுகிறார்.
 
மேலும், 1 தீமோத்தேயு 5:1-ல் முதிர்வயதுள்ளவர்களைத் தகப்பனைப் போல நடத்த வேண்டும் என்று பவுல் கூறுகிறார்.
 
எனவே, வயதில் மூத்தவர்களை மரியாதைக்காக “அப்பா” என்று அழைப்பது தவறு என்று வேதாகமம் சொல்லவில்லை. ஆனால் ஒரு மனிதனை தேவனுக்கு இணையாக உயர்த்துவதைத்தான் நாம் தவிர்க்க வேண்டும்.
 
முக்கியமானது நாம் ஒருவரை என்ன பெயர் சொல்லி அழைக்கிறோம் என்பதுமட்டுமல்ல; அவருக்கு நாம் கொடுக்கும் இடமும் மரியாதையும் என்ன என்பதுதான்.

என்னைப் பொறுத்தவரை – சரீரப்பிரகாரமாய் என்னை பெற்றெடுத்த தகப்பனையும், இப்பூமியில் நம்மை பிறக்க செய்த தேவனையும் தவிர வேறு எவரையும் “அப்பா” என்று அழைக்க விரும்பமாட்டேன். அந்த வார்த்தைக்கு அவ்வளவு கனம் உள்ளது. அதை வீணாக்க நான் நினைப்பதில்லை. 

*எடி ஜோயல் சில்ஸ்பி*

ஊழியர் - கணியாகுளம் கிறிஸ்துவின் சபை,

வேதாகம ஆசிரியர்

தொடர்பு : +91 81 44 77 6229

    

*Q&A Biblical வாட்ஸப்குழுவில் இணைய க்ளிக் செய்ய வேண்டிய லிங்க்:* https://chat.whatsapp.com/Lu8jhEd4Sag5XMhtNqGXi2

எங்களது வலைதளம் : http://www.kaniyakulamcoc.wordpress.com

எங்களது YouTube Channel பெயர் "வேதம் அறிவோம்” https://www.youtube.com/joelsilsbee

-------------------------*