#1209 - *ஒருவனுடைய பாவத்தை மற்றவன் சுமப்பதில்லை என்றும் அவனவன் செய்த பாவத்தினிமித்தம் அவனவன் கொலைசெய்யப்படவேண்டும் என்று வசனங்கள் சொல்லியிருக்க இயேசு கிறிஸ்து நமது பாவங்களுக்காய் எப்படி மரிக்கமுடியும்?* எசே. 18:20, உபா. 14:16.
*பதில்* : அவரவர் பாவத்திற்கு அவரவர்களே பொறுப்பாளிகள் என்று வேதம் கூறுகிறது (உபாகமம் 24:16, எசேக்கியேல் 18:20). இருப்பினும், சிலுவையில் நிறைவேறியதான இயேசு கிறிஸ்துவின் மரணம் *நமது பாவங்களுக்குப் பதிலானப் பலியாக* இருந்தது என்றும் வேதம் கற்பிக்கிறது.
பாவம் நம்மை தேவனிடமிருந்து பிரிக்கிறது. மனிதகுலத்திற்கும் தேவனுக்கும் இடையே பாவமானது ஒரு தடையை அல்லது பிரிவை உருவாக்குகிறது, தேவனை நாம் நமது சுய முயற்சியால் அணுக முடியாது (ஏசாயா 59:2, ரோமர் 3:23).
ஒரு பாவமும் இல்லாத, பரிசுத்தமானவரும் தேவக்குமாரனுமான இயேசு கிறிஸ்துவானவர், நம்முடைய பாவத்தின் பாரத்தைச் சுமந்து சிலுவையில் நம் இடத்தைப் பிடித்தார் (ரோமர் 5:8, 2கொரிந்தியர் 5:21).
நம்முடைய பாவத்திற்கான தண்டனையை அவர் செலுத்தினார். இயேசுவின் மரணம் நாம் தேவனுடன் ஒப்புரவாகவேண்டியதை நிறைவேற்றியது, நம்முடைய பாவத்திற்கான தண்டனையை செலுத்தியது (ரோமர் 3:25, 1 யோவான் 2:2).
விசுவாசத்தின் மூலம் நாம் நீதிமான்களாக்கப்படுகிறோம். இயேசு கிறிஸ்துவின் கட்டளைக்குக் கீழ்படிந்து அவரது வார்த்தையின்படி இரட்சிக்கப்படும்பொழுது, தேவனிடத்தில் நாம் நீதிமான்களாக்கப்படுகிறோம் (ரோமர் 3:24-25, 5:1).
கிறிஸ்துவின் சிலுவை பலியானது நமது பொறுப்பை நிராகரித்துவிடவில்லை. இயேசு கிறிஸ்து சிலுவையில் நமக்கு பதில் அவர் தண்டனையே ஏற்றுக்கொண்டபோதும், அதையும் மீறி பாவத்தில் ஈடுபடும்பொழுது நம்முடைய பாவத்திற்கு நாம் தண்டிக்கப்படுவது நிச்சயமே.
அவருடைய சிலுவை மரணமானது நமது பாவங்களை மன்னித்து தேவனுடன் ஒப்புரவாக்க வழி ஏற்படுத்தியது. உதாசீனப்படுத்தும் பொழுது அவரவர்கள் அதற்கான தண்டனையை நிச்சயம் பெற்றுக்கொள்வர். 2தெச. 1:7-10, எபி. 2:2-4.
மேலும், எசேக்கியேல் 18:20ம் வசனங்களின் கருத்தை புரிந்துக்கொள்வது அவசியம். ஒவ்வொருவரும் அவரவர் பாவங்களுக்கு பொறுப்பாளிகள். உங்கள் பெற்றோர் அல்லது மூதாதையர்கள் செய்த பாவங்களுக்கு நீங்கள் நியாயத்தீர்ப்பில் தண்டிக்கப்படுவதல்ல.
நாங்கள் சுத்தவான்கள், நேர்மையானவர்களாயிருந்தும், தங்களது முன்னோர் அல்லது பிதாக்கள் பாவம் செய்ததாலேயே தாங்கள் சிறைபிடிக்கப்பட்டு தண்டிக்கப்படுவதாகக் யூதர்கள் கூறினர்.
ஆனால், அவர்களது முன்னோர் செய்த அதே பாவங்களை இவர்களும் தொடர்ந்து செய்வதால் சிறைபிடிக்கப்பட்டதை தேவன் சுட்டிக்காட்டுகிறார்.
ஆதாமின் பாவத்திற்கோ வேறு யாருடைய பாவத்திற்கோ இயேசு கிறிஸ்து பொறுப்பாகவில்லை. (எபிரெயர் 4:15). அப்படியானால், உலகின் பாவங்களைச் சுமக்க இயேசு கிறிஸ்து தேர்ந்தெடுக்கப்படவில்லை என்று அர்த்தமல்ல.
பலியாக செலுத்தப்பட்ட வெள்ளாட்டுக்கடாவைக் குறித்த வசனத்தைக் காணவும்:
“அதின் தலையின்மேல் ஆரோன் தன் இரண்டு கைகளையும் வைத்து, அதின்மேல் இஸ்ரவேல் புத்திரருடைய சகல அக்கிரமங்களையும் அவர்களுடைய எல்லாப் பாவங்களினாலும் உண்டான அவர்களுடைய சகல மீறுதல்களையும் அறிக்கையிட்டு, அவைகளை வெள்ளாட்டுக்கடாவினுடைய தலையின்மேல் சுமத்தி, அதை அதற்கான ஆள்வசமாய் வனாந்தரத்துக்கு அனுப்பிவிடக்கடவன். அந்த வெள்ளாட்டுக்கடா அவர்களுடைய அக்கிரமங்களையெல்லாம் தன்மேல் சுமந்துகொண்டு, குடியில்லாத தேசத்துக்குப் போவதாக; அவன் அந்த வெள்ளாட்டுக்கடாவை வனாந்தரத்திலே போக விடக்கடவன்”. லேவி. 16:21-22
இஸ்ரவேலின் பாவங்களுக்கு ஆடு பொறுப்பேற்கவில்லை, அல்லது ஆடு பாவம் செய்யவில்லை, ஏனென்றால் அது இஸ்ரேலின் பாவங்களைச் சுமக்கத் தேர்ந்தெடுக்கப்பட்டது. அந்த செயல் *பாவத்தை நீக்குவதைக் குறிக்கிறது*. அவ்வாறே இயேசு கிறிஸ்துவும் நம்முடைய பாவங்களைச் சுமந்தார்.
ஒரு பாவமும் அறியாத இயேசு கிறிஸ்து, தேவனுடைய கோபத்திற்கு நாம் ஆளாகாமல் இருக்க, நம்முடைய பாவங்களுக்குத் தகுந்த தண்டனையை அவர் மனமுவந்து ஏற்றுக்கொண்டார். அதாவது பரிசுத்தமாய் இருந்தபொழுதும் நமக்காய் நம்மை மீட்கும்பொறுட்டு அவர் ஒரு பாவியாக நடத்தப்பட்டார்.
*எடி ஜோயல் சில்ஸ்பி*
ஊழியர் - கணியாகுளம் கிறிஸ்துவின் சபை,
ஆசிரியர் - கணியாகுளம் வேதாகம பள்ளி,
தொடர்பு : +91 81 44 77 6229
*Q&A Biblical Whatsappல் இணைய (locked group):*
https://chat.whatsapp.com/Lu8jhEd4Sag5XMhtNqGXi2
*எங்களது வலைதளம்* : kaniyakulamcoc.wordpress.com
கருத்துகள் இல்லை:
கருத்துரையிடுக